Da war ämal ä gleenes niedliches Mädchen. Das grichte von seiner Großemudder änne feierrote Samtgabbe mit änner Bummel dran. Drin sah de Gleene so schnärblich aus, daße barduh geen andern Bibbi mähr uffsetzte. Un so gams, daße von dr ganzen Nachbarschaft Rotgäbbchen genannt wurde.

Eenes Dages sagte de Mudder zu dr Gleenen: "Gomm, mei Gind, nimm hier das Henkelgärbchen un brings naus bei de Großemudder. Se hat ähmd telefoniert, daßrch gar nich hibsch is heite."

"Was isn da drinne im Gorbe?" fragte Rotgäbbchen.

"Änne Flasche Abbelwein, änne Biggse Eelsardin' un änne Bäbe (sächsisches Nationalgebäck). Daßde mir aber nich etwa unterwächens am Guchen rumgnaubelst! Wenn de Hunger hast, ißde deine Bämmchen mit Gunsthonich, verschtanden?"

Rotgäbbchen verschbrach scheene zu folchen un hubbte frehlich in dn Frielink naus.

Wiese nach änner Värtelschtunde im Walde drinne war, gam blätzlich ä Wolf angelaatscht. - Was das fier ä Dier is, wolltr wissen? - Nu, da schtellt eich ämal Bäzolds Garo vor, denkt eich noch ä Schtickchen dran, drzu ä viel schbitzern Gobb un gliehende Oochen - un da habtr ä Wolf. So ä Viech gam also ausn Busche un meente: "Bei wän willstn, Rotgäbbchen?"

"Bei de Großemudder."

"Nu weeßte, da wärd'ch awer där alten Frau ä baar Bliemchen mitnähm. Das geheert sich eenfach so fier ä gebildetes Enkelgind."

"De hast eechentlich recht", sagte Rotgäbbchen, schtellte ihrn Gorb unter änne Danne un bickte sich nach Anemon' und Briemeln. Se hatse awer nich gleich mitr Wurzel rausgerubbt wie ihr, sondern jedes eenzelne ganz sachte abgegnibst.

Dr Wolf feixte in sich nein un säbbelte naus bei de Großemudder. Dort schbrangr mit een Satze ins Heischen, sauste durch die gute Schtuwe un dann hinter in de Gammer un verschlang de alte Frau. Se hatte iwerhaupt nich Zeit, um Hilfe zu brilln, da saße schon drinne im Wolfsbauche. Na un da warsch nadierlich zu schbäte. Hieruff groch das beese Dier ins Bette nein, deckte sich bis nuff zu un schtilbte sich dr Großemudder ihre lilane Nachtmitze iwersch Gesichte. Nach änner Weile gam Rotgäbbchen un wunderte sich, daß de Diere uffschtand. Nu, wahrscheinlich dud de Großemudder grade liften, dachte se dann un lief nein in de Gammer. Da fielr nu gleich uff, daß de alte Frau heite so ä färchterlich großen Mund hatte.

"Awer meine gude Großemudder", meente se, "wie siehste denne aus? De hast wohl de Maulschbärre gegricht?"

Se beichde sich ä bißchen diefer iwersch Bette. Da riß dr Wolf den Rachen uff un wärchte ooch noch 's gleene Mädchen nunter. De Großemudder rickte ä Häbbchen beiseite, un nu saßense alle beede drinne.

Wenn mr wenichstens de Bäbe mit hinne hätten, dächte Rotgäbbchen. Awer reden gonnte se nischt, denn de Luft war gans dick un schnierte ihr de Gäle zu.

Dr Wolf schlief nach däm Reggordfriehschtick ein un schnarchte so laut, daß draußen de Boomschtämme waggelten.

Da gam ä Jächer angeleiert, heerte das Schnarchen un dachte: "Ich gann mr nich hälfen: Das is doch direggt unweiblich von där alten Frau, so drufflos zu rasseln!" Dann ginkr nein ins Heischen un märkte nadierlich gleich, wen'r da im Bette vor sich hatte.

"Habbch dich endlich erwischt, du frächer Gadette!" riefr, holte aus dr Giche dr Großemudder ihre Gefliechelschäre un schnibbelte behutsam dn Wolfsbalch uff. Das war nu vielleicht änne Freide, wie die beeden wieder ans Dageslicht gegollert gam! De alte Frau butzte ihre Brille, die da drinne gans angeloofen war, un Rotgäbbchen schtobbte dn Wolfsbauch voll Brigetts ausn Gohlngasten un nähte dann das beese Dier wieder zusamm.

Un wie nu dr Wolf uffwachte un sich heimlich ausn Schtaube machen wollte, blumbstr dod uffn Bettvorlecher. De Großemudder, Rotgäbbchen un dr Jächer tranken dn Abbelwein, machten sich iwer de Eelsardin un deilden sich in de Bäbe. Se warn sähre froh, daß de Sache noch so scheen abgeloofen war.

Nu nähmt eich draus änne Lehre - besonders ihr Mädchen: 's is immer besser, ä weibliches Wesen gimmert sich iwerhaubt nich drum, wennse unterwächens eener angwasselt, denn mr gann nie wissen, was drhinterschteckt.